韦斯咸前锋查洛保云今季演出抢镜，为「锤仔帮」各项赛事上阵22场射入13球及4次助攻，据悉英格兰国家队主帅修夫基正在密切留意呢位27岁射手表现，好可能会徵召佢出战明年欧国盃决赛周。

查洛保云近3次上阵都取得入球，包括上仗英超入波击败曼联，今季联赛已有11球进帐，英格兰名宿瑟顿认为查洛保云值得占国家队一席位，参加明年欧国盃决赛周：「查洛保云唔止识入波，而且技术非常全面，佢状态出色，修夫基冇理由唔拣佢踢大赛。」

查洛保云曾於2021/22年球季英超入12球，打出名堂，并於2022年5月首次晋身英格兰国家队，但最後落选「三狮兵团」上届世界盃名单，直至今年10月先至获得重召。

韦斯咸领队莫耶斯曾经表示，查洛保云因为无缘上届世界盃，导致状态下滑，幸好已走出阴霾，今季愈战愈勇，加上曼联前锋拉舒福特状态低迷，查洛保云随时取代「福仔」嘅国家队位置。