车路士周四(28日)凌晨主场2比1力克水晶宫，不过前锋尼高拉斯积逊嘅表现继续令人失望，佢喺下半场再次错失单刀机会，之後入波又因越位在先食诈胡。唔少车路士球迷都指呢位前锋「冇得救」，据报球队打算喺1月收购施斯高顶替。

尼高拉斯积逊今季失机频频，上场对狼队已经连环糟蹋黄金机会，今仗继续获普捷天奴委以重任，可惜继续败家演出，74分钟仲系1比1嗰阵，尼高拉斯积逊接应干拿加历查直线成单刀，点知佢笠射竟然射咗去柱边出界。大批球迷赛後留言批评「英超史上最差前锋」、「世上有3样嘢系无可避免，交税、死亡同尼高拉斯积逊失机」。

据《The Athletic》报道，车路士已经将1月买前锋列为首要任务，不过佢哋心仪嘅域陀奥森汉同艾云东尼，预计转会费都要1亿镑，所以车路士已物色其他代替人选，效力RB莱比锡嘅施斯高就系目标之一。