英格兰近年新人辈出，国家队亦有人满之患，苏格兰国家队助教卡华近日证实，佢哋正力邀4名冇份入选英格兰国家队嘅球星「过档」，而且4人全部都系纽卡素球员，包括安东尼哥顿、哈维班尼斯、利夫拿文度同艾利洛安达臣。

4位纽卡素球员近2季成功弹起，不过距离入选英格兰大军仲有漫漫长路，4人中只有哈维班尼斯喺3年前曾帮英格兰上阵过1次，条例上仍然可以选择「转籍」。苏格兰助教卡华表示：「我哋喺纽卡素物色紧4个球员，希望可以加强国家队力量，但我哋只想要甘愿代表苏格兰嘅球员。」

事实上，利洛安达臣今年曾获苏格兰徵召，但佢因为仲未揸定主意，喺入选後再选择退队，卡华表示：「佢哋全部都好後生，应该先踢好比赛再谂入选国家队，不过我哋会畀英格兰好大压力。纽卡素4个球员只系我哋考察之一，仲有其他球员都会注视。」