今季战绩沉沦嘅车路士，周四(28日)凌晨主场迎战水晶宫，排出平均年龄只得23岁零21日嘅正选阵容，打破车路士喺英超史上最年轻正选纪录。呢班小将亦冇令领队普捷天奴失望，最後凭马度基12码绝杀，2比1赢水晶宫。

车路士之前4场联赛输3场，已跌落联赛榜下半版，今仗普捷天奴派出极年轻阵容，最老嘅尼干古都系得26岁。13分钟车路士一次美妙组织，由梅迪历近门射入，不过车仔防线始终不稳，完半场前走甩米高奥利斯，被对手追成1比1。下半场车仔继续主攻，完场前马度基博度12码，佢喺89分钟亲自操刀射入致胜球。

普捷天奴赛後表示：「我梗系想赢晒之後嘅比赛，球队就会喺前列，但现实系我哋同前列份子距离有啲远，我只系想球员继续进步，如果可以用今场作为起点打出一段走势，车路士绝对有足够嘅质素去争取胜利。」