曼联圣诞新年档期1胜2负，压力沉重，但另边厢被踢出一队嘅查顿辛祖就花天酒地，圣诞期间被影到同美女开派对狂欢，生活多姿多采，最重要系佢仲逗紧曼联周薪35万镑(约350万港元)去玩，同球队打生打死形成强烈对比。

查顿辛祖被踢出曼联一队，被禁止出席操练同去饭堂用餐，只能够领取饭盒同独自操练，似乎好悲惨，但原来现实中嘅查顿辛祖相当识玩，既然唔使练波同比赛，佢就尽情狂欢，刚过去嘅圣诞档期，被影到同尼日利亚女dancer可卡因娜狂欢，影片所见两人面贴面相当亲热，查顿辛祖玩得相当开心。

可卡因娜既系dancer亦系网红，跟随者人数过百万，之前传过同一位尼日利亚歌手拍拖，但已经分手，仲同查顿辛祖玩埋一齐。照咁睇嚟查顿辛祖唔会向坦哈格道歉，亦唔打算重返曼联一队，坚决同坦哈格「斗长命」。