曼联2023年收炉赛事1比2输畀诺定咸森林，原来传奇领队费格逊有入场支持，亦系佢82岁生日前夕，陪佢一齐仲有新股东拉特克利夫团队重臣巴斯福特，一齐见证「红魔鬼」输波。

费格逊为曼联赢过38个锦标，包括13次英超同2次欧联冠军，而佢身边嘅巴斯福特亦系体坛猛人，59岁嘅巴斯福特系前英国单车队教练，曾带领国家队喺2004、2008同2012年3届奥运夺得18面金牌，另外佢率领嘅两支职业单车队赢过7届环法大赛冠军，夺冠能力拍得住费爵爷，一样系世界级。

曼联以一场输波结束2023年，费爵爷同巴斯福特都被影到黑面一幕，不过曼联官网喺费Sir生日正日仍然出Po祝佢生日快乐，上载海报标题为：「我们每个人都爱费格逊爵士」，并写道「生日快乐，费爵爷！」但系曼联呢场踢成咁，费Sir点会快乐呀？