除夕夜，英超圣诞新年快车上演伦敦打吡，富咸主场硬撼阿仙奴。富咸近况转沉，主因系攻力大跌Watt，阿仙奴一众前锋脚风欠顺，而且客场例踢得保守，加上新败更加唔敢轻举妄动，2.5球入球细值得捧场。（Now 621及611周日晚10时直播）

富咸本来主场出击特醒，之前曾连续2场主场豪派诺定咸森林同韦斯咸各5蛋，唔讲得笑。不过呢支伦敦球队突然下滑，各项赛事近4场法定时间只得1和3负，其中联赛3连败，最弊系呢4场入得1粒咁大把，当然与箭头鲁尔占美尼斯因对纽卡素「直红」而停赛3场有关，不过呢位墨西哥射手今季联赛只系入得4球，就算佢今仗刑满复出，亦未必令进攻有好大提升。

另边厢，阿仙奴同样跌Watt，各项赛事近5场赢得1场咁大把，特别系一众前锋：加比尔捷西斯、加比尔马天尼利、布卡约沙卡等脚头无灵，单计联赛，阿仙奴首席射手系布卡约沙卡同尼基迪亚，都只系各入5球，上轮主场围攻韦斯咸，全场射门多达30次，亦有77次喺对方禁区内触球，竟然食白果下净吞两蛋，前锋把握力咁差点争标呀？

查实阿仙奴客场特别保守，今季踢咗9场作客只入14球，仅失8粒，单计近5场联赛作客有4次开2球或以下，可见主帅阿迪达於客场偏重防守，加上首循环主场交手畀富咸偷到鸡逼和2比2，佢都唔想喺2023年最後一仗失分收场，今仗一定小心翼翼，入球细乃明智之选。