周二(16日)凌晨非国盃C组赛事，喀麦隆只能1比1逼和畿内亚，佢哋赛前出现意外情况，门将奥拿拿原本坐私人飞机赶去科特迪瓦参赛，但因天气问题耽误行程，结果被领队桑治弃用。据报奥拿拿对桑治决定表示不满，双方亦冇任何沟通，随时再爆内乱。

奥拿拿出战非国盃前，曼联成功将佢留到「最後一刻」，踢完周一(15日)凌晨对热刺场英超後，奥拿拿有唔够24个钟头时间由英国飞去科特迪瓦参赛，点知因为天气问题，奥拿拿嘅私人飞机唔能够准时起飞，最终桑治决定唔使佢参加对畿内亚嘅比赛。

据报奥拿拿得悉自己咁辛苦赶嚟比赛，但连大军名单都入唔到後，情绪一度非常激动，要塞内加尔名宿迪奥夫安抚。喺卡塔尔世盃期间，奥拿拿已经同领队桑治爆发冲突，结果喺赛事期间被赶出国家队，今次事件随时又系另一粒计时炸弹。

喀麦隆喺今仗表现差劲，只靠马格利入波1比1逼和畿内亚，同组另一场塞内加尔就有沙迪奥文尼交出助攻，以3比0大胜冈比亚排榜首。