曼联名宿朗尼早前被英冠球队伯明翰炒鱿之後，近日趁得闲同老婆麦露莲去阿联酋杜拜旅行，影咗唔少相片，并放上社交网。英国《太阳报》引述消息人士，指朗尼有兴趣去沙特阿拉伯搵食，今次先带老婆去中东视察环境。

38岁嘅朗尼挂靴之後，曾经执教打比郡、华盛顿联队、伯明翰，但都因为成绩差被炒，消息人士指呢位英格兰少帅仍然对教波充满热诚：「朗尼执教伯明翰虽然未尽人意，但佢认为自己学到好多嘢，以及需要改进，对於担任教练充满期待，亦希望有朝一日执教沙特阿拉伯球队。」

朗尼之所以想去沙特搵食，可能受到另一位英格兰名宿谢拉特启发，「谢老四」教波生涯同样失意於英格兰本土，现时担任沙特球队伊蒂法克主帅，即使球队成绩一般，帅位仍然稳阵，而且获得高薪。

加上昔日曼联队友C朗效力沙特豪门艾纳斯，有大把老友照应，朗尼去到当地生活，应该容易适应。