利物浦勇夺英联盃冠军，落场球员个个交出100%功课，不过最令球迷印象深刻非日本中场远藤航莫属！季前只系利物浦收购「Plan C」嘅远藤航，满场飞表现技压车路士「1亿镑」先生摩西斯卡些度，原来佢仲负伤顶晒120分钟赛事，完场後要拎拐杖兼着保护靴离场。

高普季前想签摩西斯卡些度同罗美奥拉维亚，点知2个中场都畀车路士「截胡」，不过世事就系咁奇妙，「红军」最後用1,600万镑就签入远藤航，而佢今季演出超乎想像，更获选利物浦12月最佳球员。高普早前就曾公开表示「好彩」签唔到摩西斯卡些度，否则就会错失远藤航。

今场远藤航不惜气力抗衡车路士中场，尾段更被摩西斯卡些度踢伤足踝，但佢依然顶足120分钟，高普赛後都觉得不可思议：「远藤航行去颁奖台嗰段路，系我见过最疲惫嘅双脚，我的天呀！呢个系乜嘢球员！」远藤航离开球场嗰阵，被影到要拎住拐杖，左脚亦着上保护靴，暂时未知伤势有几严重。