利物浦凭华基尔云迪积克(VVD)一箭定江山，历史性第10次赢得英联盃冠军，VVD赛後亦当选决赛最佳球员。今次系呢位荷兰国脚历来第3次喺决赛当选MVP，亦系首次以队长身份带领利物浦捧盃，难怪完场後专登拍片，霸气反击外界质疑！

现年32岁嘅VVD一直被誉为「世一」中坚，但近2季演出开始受到质疑，今场决赛佢交出完美数据，3次拦截、7次争夺成功、101次成功传送同超过9成成功率，就连进攻都有2次关键传球同最重要嘅1个入波，继2019年欧联决赛、2022年英联盃决赛後，第3次喺决赛当选最佳球员。

VVD赛後喺更衣室庆祝，不忘拍片反击质疑，佢对住镜头霸气表示：「佢哋觉得我已经玩完喎！」VVD喺赛後受访就话：「两队都有好多入球机会，结果实在太神奇，今次系我做队长後第1个冠军，要好好享受一下！」