安达斯彭利拿2022年7月正式由曼联转投富咸後，获得重生，根据英国《太阳报》爆料，比利时国家队主帅泰迪斯高有意徵召呢位巴西裔球员入伍，出战今届欧国盃决赛周，但安达斯彭利拿却拒绝，因为佢仲未放弃重披「森巴战衣」嘅梦想。

安达斯彭利拿嘅爸爸巴西人，妈妈有德国血统，佢喺比利时出世，自细喺欧洲生活及接受培训，曾经为比利时U15至U17小国脚上阵，直至2014年决定「认祖归宗」代表巴西U20，并协助球队获得2015年世青盃亚军。

彭利拿2018年晋身巴西大国脚，出战热身赛对萨尔瓦多，成为巴西国家队超过100年以来，首位喺外国出生嘅上阵球员，极具历史意义。不过，该仗亦系安达斯彭利拿至今唯一一次为巴西披甲，根据国际足协规例，球员如果只系踢热身赛，仲可以「转会」选择代表其他国家队，所以引来泰迪斯高注意，邀请安达斯彭利拿为出生地比利时效力。

不过，安达斯彭利拿已拒绝泰迪斯高好意，佢接受巴西传媒访问时话：「佢哋(比利时足总)季初接触过我，亦联络我嘅经理人，问我愿唔愿意接受徵召，我嘅答案好清晰，我系巴西人，梦想系代表巴西队，冇嘢可以改变我嘅想法。」安达斯彭利拿已经28岁，加上未知巴西几时重召佢，放弃代表比利时之後，恐怕难有机会参加国际大赛。