西甲盟主巴塞隆拿喺转会市场行动迅速，继8,000万欧元签入英格兰国脚安东尼哥顿後，闪电再同阿根廷前锋祖利安艾华利斯达成转会协议，呢位射手已向马德里体育会表达转会诉求，转会费将高达1.2亿欧元。巴塞同时亦接近签入自由身嘅贝拿度施华，3大转会可望世盃前拍板。

西甲煞科唔够1个星期，巴塞即疯狂抢人，转会权威罗曼诺爆料：「巴塞同艾华利斯经理人见面，准备向马体会第1次开价，唔包含球员交换，有可能超过1亿欧元，艾华利斯已经提出转会。」消息指马体会叫价1.2亿欧元，连同周四(28日)飞抵西班牙签约嘅安东尼哥顿，两大前锋总值将达2亿欧元。

另外，加泰罗尼亚多个媒体报道，巴塞已正式出手签葡萄牙中场贝拿度施华，并开出一张到2028年夏天嘅合约，31岁嘅施华离开曼城後，获得祖云达斯、马德里体育会等球会斟介，但佢一直视巴塞为第1选择。

西班牙电台SER报道巴塞嘅组军工作：「哥顿已经搞掂、艾华利斯亦进行中、施华进展极快，会喺世盃前加盟。迪高(总监)畀到费历克想要嘅阵容深度，巴塞喺今个转会窗嘅速度，快到冇人估到。」