周四(20日)凌晨英超演出球迷奇遇记，李斯特城主场对热刺嘅前列大战，热刺凭住贝云积喺95分钟同97分钟连入2球，戏剧性3比2反败为胜，同时缔造英超史上「最迟」反胜纪录！

热刺今场踢得相当自动，不过开纪录嘅却系李斯特城，佢哋24分钟由达卡射成1比0，热刺38分钟由哈利卡尼突破越位追平；下半场热刺仍然系优势，但76分钟又被李斯特城嘅占士麦迪臣攻陷。热刺80分钟换入盛传行将归队嘅翼锋贝云积，估唔到靠佢起死回生。去到补时5分钟，贝云积接应马特杜靴迪传送近门撞入，97分钟再单刀扭过卡斯柏舒米高「绝杀」。

Opta数据显示，热刺喺94分钟52秒仍然落後，终究赢波系英超史上最迟出现嘅反胜，旧纪录系曼城喺2012年嘅煞科日捧盃经典，其时曼城喺91分钟14秒仍输畀昆士柏流浪，之後连入2球反胜兼捧走英超冠军。早前有消息指热刺计划将贝云积卖畀阿积士，但价钱倾唔掂而未能成事，不过领队干地赛後就话：「我一直都话贝云积系重要球员，佢有球队所短缺嘅特质，热刺亦缺乏创造型球员，我信任佢会好乐意持续留效热刺。」