今晚英冠有场直播戏码，3哥布力般流浪主场迎战米杜士堡。布力般近期走势回落，射手比尼顿更频频食白果，相反米杜士堡各项赛事5连胜气势如虹，此消彼长下今仗开平手盘，宁买当头起捧米堡坐和望赢。（有线661及601台周二凌晨3时45分直播）

力争升上英超嘅布力般，早前试过联赛6连胜，十分勇锐，可惜踏入2022年後开始行衰运，走势逐步放缓，各项赛事近4仗只得1胜1和2负，唔单止喺英足盃畀英甲韦根淘汰，上轮联赛亦净吞侯城两蛋，连主帅莫比利都冇晒计。

王牌哑火 布力般跌晒Watt

布力般今季能稳占前列，王牌射手比尼顿功不可没，呢位智利前锋喺联赛已经有20球进帐，排射手榜第2位，亦系阵中仅有入波达双位数球员，可见球队适当倚赖佢，不过比尼顿喺2022年4仗都仲未开斋，难怪布力般成绩跌Watt。

另一边厢，米杜士堡自从上年11月炒咗老帅禾诺克，改由前锡菲联教头韦达接手後，展开复苏脚步，佢领军10仗取得7胜2和1负，单计近5仗更加全部赢晒，包含击败2哥般尼茅夫，可谓真材实料，上仗亦凭马特曲斯末段省两粒反胜雷丁2比1，士气大振。

米杜士堡依家走势咁好，冬天转会窗一於玩大佢，先後借入白礼顿前锋艾朗干洛尼，同阿仙奴新星巴洛根，摆到明有野心想升班。米堡目前虽然只排第7位，落後次席般尼茅夫同布力般流浪7分，但佢哋打少一场，若果今晚赢波，就可以同呢批升班劲敌拉近距离，今场「6分波」肯定唔衰得，个势咁旺平手盘必撑米堡。