利物浦喺周日(23日)英超作客水晶宫，喺球证2次争议性判定获益下3比1赢波，依家只系落後「1哥」曼城9分兼且少踢1场，重燃争标期望。「赤军」领队高普赛後心境大靓，专程派啤酒畀作客嘅球迷庆祝成功。

利物浦今场早段操控战局，华基尔云迪积克开波8分钟就接应角球顶入，32分钟安德鲁罗拔臣左路传中，越位嘅罗拔图法明奴争顶失利，但个波漏向远柱被阿历士张伯伦窄位抽入，球证认为罗拔图法明奴唔算参加进攻而判入球有效。

落後2球嘅水晶宫急起直追，令利物浦防线风声鹤唳，55分钟奥辛尼艾度亚迪追成1比2後，主队愈加气势如虹，不过完场前再有争议判定，利物浦前锋迪亚高祖达禁区内主动撞向水晶宫门将古亚达，球证本来都觉得冇事，但VAR要求翻睇後，球证再改判12码，利物浦由法宾奴操刀射成3比1完场。

水晶宫领队韦拉赛後不满表示：「我唔系好想讲法律问题，因为我唔想对球证不敬，最後个判定系好差嘅决定，迪亚高祖达真系好聪明，而VAR真系好单纯。」赢波嘅利物浦就一於少理，赛後有作客利迷喺队巴为球队助威，高普就专登由巴士拎几支啤酒落车派畀球迷，齐齐庆祝呢场重要胜仗。