曼联喺周日(23日)凌晨英超以1比0绝杀韦斯咸，近期闹离队嘅安东尼马迪尔亦功不可没，呢位法国国脚策划球队致胜入球，赛後获看守领队兰历克大赞，安东尼马迪尔有可能改变主意，选择留队。

安东尼马迪尔上月已经要求离队，盛传西维尔、祖云达斯都有意签佢，但一直未成事。今场争英超前4位之战，踢到82分钟，安东尼马迪尔後备上阵，并喺补时最後一击发挥重要作用，佢攞到波之後，杀入禁区引开对方守衞，然後传畀无人看管嘅卡云尼，後者第一时间传中，由拉舒福特射入，过程非常流畅。

赛後曼联主帅兰历克点名称赞马迪尔：「一个星期前，我同安尼东倾过，主要讲专业精神问题，我唔知佢会留队几耐，亦或即刻想走人，我认为最重要系保持专业精神，呢次对话好有用，近2场比赛，佢都有入选大军名单，并喺今场入波过程中发挥重要作用，我知佢系顶级球员，英超最佳前锋之一，佢今场表现出专业精神，我觉得好满意。」

兰历克亦赞入波功臣拉舒福特系英格兰顶级射手之一，拥有现代前锋所需要嘅一切质素，包括速度、技术、体型、体能，认为佢连续2场入波，可以大大提升自信。