今晚英超早场上演曼联主场迎战修咸顿，「红魔鬼」上场作客排包尾嘅般尼，竟然和波失分，中前场球员把握力差问题再次浮现，加上C朗脚风唔顺，预料甚难攻陷「圣人」防线，以曼联近4场主场总入球全开2球或以下嘅走势，2.5球入球细绝对追得过。（Now 621及611周六晚8时30分直播）

曼联近况认真麻麻，早前喺英足盃主场斗英冠球队米杜士堡，踢足120分钟都只能同对手打和1比1，最後更喺互射12码阶段落败出局。去到上场英超作客榜尾般尼，即使全场录得22次射门，但仅入得一球，再次和波痛失两分，令球迷相当失望。除咗进攻效率低，近期曼联似乎行紧衰运，中楣、中柱、射失12码、食诈胡、球证误判……瓣瓣都齐，学前辈黄兴桂话斋「好运紧要过好波」，冇运嘅话，你几好波都冇用。

曼联成绩同C朗都有莫大关系，呢位葡萄牙巨星已经连续5场食白果，录得个人近12年最长入球荒，加上不时传出球员不满看守领队兰历克嘅战术及言行，球队更衣室气氛点会好，喺将帅不和阴霾下，目前不宜对曼联存有厚望。

修咸顿陷入地狱赛程，过去两场英超先後对传统「Big 6」曼城及热刺，不过佢哋反而踢出惊喜，先同榜首曼城踢成1比1，终止对方联赛连胜走势，上场作客热刺两度落後下，反胜3比2更加打起士气，今仗作客奥脱福唔系冇得踢。「圣人」喺之前英足盃亦踢到加时淘汰高云地利，士气高昂有力同曼联周旋，加上「红魔鬼」主场经常踢得绑手绑脚，近4场主场全开细，2.5球入球细抵玩。