周六（12日）葡超打吡爆发激战，讲嘅唔止系两边踢成2比2嘅激烈战况，仲有末段因比比疑被对方踢中头，而引起嘅两军职球员40人大混战，就连执波仔都加入战团。终究扰攘近5分钟，球证共向两边出示4张红牌，连带士砵亭一人下半场两黄一红，今场共出现5张红牌，而作为惹火尤物嘅比比当然走唔甩！

波图对士砵亭嘅葡超打吡一贯会踢得火花四溅，周六（12日）嗰场当然不乏火药味。作客嘅士砵亭上半场凭保连奴同纽奴山度士各入一球领先，波图嘅法比奥韦拉回敬一球追成1比2。易边後士砵亭守衞高亚迪斯两黄一红被逐，主队乘打多一人优势，踢至78分钟凭泰利米扳平2比2。

今场补时长达9分钟，就喺最後1分钟，波图守衞比比喺禁区置疑被祖奥包连夏晒靴踢中块面，呢位前皇马後衞随即瞓地大叫。当球证吹停赛事时药引随即燃起，两边後备席职球员冲入球场理论，场内共40人互有动作，球证向祖奥包连夏、般奴达巴达同马捷斯出示红牌，混乱局势乃至惹来场边嘅执波仔「打埋一份」。原本「逃过一劫」嘅比比後来又起庖丁，同对方互有推撞，终究「申请」领红成功，难逃被逐命运。终究扰攘近5分钟，加上下半场高亚迪斯嗰张，球证以共5张红牌为呢场大乱斗画上回号。