今晚欧霸16强次回合焦点战，加拉塔沙雷主场迎战巴塞隆拿。首回合互交白卷，巴塞主帅沙维嬲到震，以奥巴美扬为首嘅锋线收到「柯打」，今仗一定全力抢攻；加拉塔沙雷防线甩漏多，今仗实多波入，中位数2.5球大盘捧得过。

（Now 643周五凌晨1时45分直播）

首回合打和0比0，巴塞罕有地半场一口气作出3个调动，可惜都系徒劳无功，赛後主帅沙维非常不满球员过於慢热，要求呢班有质素嘅球员今仗一开波就要立即入局，向对手进行高强度逼抢，务求尽快入波，打出具组织嘅进攻足球，预计首回合做後备、但近期入球停不了嘅奥巴美扬，以及老大哥布斯基斯等今仗会担正。

另一边厢，土耳其球队加拉塔沙雷首回合踢得相当被动，全靠从巴塞借用嘅门将彭拿屡救险球，先至可以力保不失，作客劣势下全身而退。加拉塔沙雷首回合唔输可以话幸运成分居多，想喺今仗偷鸡出线亦唔容易，因为佢哋近8仗主场只得2胜，兼且场场有失波，防守坚唔稳阵。

巴塞隆拿自从冬窗签入奥巴美扬、费伦托利斯、艾达马查奥尔等新兵後，攻力全面升呢，单计近6仗共轰入18粒，其中5仗总入球开3球或以上，包括西甲对华伦西亚及欧霸对拿玻里都各入4球，火力全开，球员经过沙维鞭策後战意必坚，不过客胜太奀冇肉食，转捧2.5球大盘更上算。