英国传媒报道，曼联招聘新帅陷入僵局，主要原因系队内最具份量3巨头意见不一，佢哋就系看守领队兰历克、传奇领队费格逊同巨星C朗拿度，佢哋各自心目中都有心仪人选，令选帅进程停滞。

《每日镜报》报道，曼联已经5季无冠，打入欧联8强次数少过宾菲加，已经退出欧洲顶尖劲旅舞台，而之前聘请多位名帅都失败收场，皆因红魔鬼历史包袱太重，令选帅问题更加复杂，曾有消息指施丹一度接近入主奥脱福，却因施丹妻子反对到英国生活，最终告吹。

目前曼联选帅目标范围不大，传奇领队费格逊心仪人选系安察洛堤，佢认为「肥安」可协助曼联重回正轨，之前重建爱华顿亦好成功，但问题系该意大利名帅今季重返皇马，西甲夺冠在望，欧联杀入8强，曼联要说服佢过档难度不少。

C朗最欣赏嘅主帅系西班牙领队安历基，佢曾於2015协助巴塞隆拿取得三冠王，系C朗心仪嘅主帅人选。现时安历基执教西班牙重返正轨，今年征战世盃，曼联用咩理由叫安历基唔教西班牙，走嚟教你曼联先？

兰历克嘅目标人选系阿积士主帅坦哈格，次选先系巴黎圣日耳门嘅普捷天奴，其实呢两个人选系最正路，亦系传媒连日来报道嘅人选，不过兰历克喺曼联嘅影响力远远不及费爵爷同C朗，而且阿积士同PSG都喺欧联16强出局，如果佢哋嚟教曼联，球迷又会继续话「咪一X样」！