C朗发表警世宣言 拒绝世界盃遗憾
葡萄牙喺世界盃外围赛附加赛淘汰土耳其之後,将於下周三(30日)凌晨同北马其顿争夺1张决赛周入场券,虽然葡萄牙被睇高一线,但球星C朗不敢怠慢,发表警世宣言,声称球队仲未赢到任何嘢,呼吁队友必须尊重对手,全力以赴争胜。一般相信今届将会系37岁C朗最後1次参加世界盃决赛周,当然唔想临门一脚失机,令球员生涯留下遗憾。
C朗透过社交网发文激励队友:「我哋向打入2022世界盃决赛周嘅伟大目标,踏出第一步,但仲未赢到任何嘢,仲未完成目标,我哋必须继续集中精神,以最认真嘅态度备战,尊重对手,并相信自己嘅能力,强大嘅葡萄牙,向卡塔尔进发!」
原本以为葡萄牙会喺附加赛决赛同意大利争夺决赛周资格,但呢支上年欧国盃冠军却大热倒灶,被北马其顿淘汰,葡萄牙避开强敌,理应系好事,但C朗反而担心队友会轻敌,令北马其顿有机可乘,导致葡萄牙步意大利後尘,所以高调公开呼吁队友必须将北马其顿当成劲旅应付。
由於C朗已经37岁,一般相信今届将会系佢最後1次参加世界盃决赛周,亦系佢最後机会争夺呢项大赛锦标,希望加冕成为「千古一帝」球王,如果葡萄牙未能出线,肯定系佢球员生涯一大遗憾,所以呢位射手比任何人都更加渴望葡萄牙出线。
葡萄牙领队费兰度山度士对於球队出线信心十足:「每位球员都知道现时处境,呢场波系决赛,决赛从来都非常难踢,我哋有唔少出战决赛嘅经验,相信可以胜出。」
葡萄牙喺世界盃史上最威水系1966年获得季军,当年有「黑豹」尤西比奥助阵,但其後陷入黑暗时期,由1970至1998年只曾1次晋身决赛周,至於过去5届都有份参赛。
另外,葡萄牙迎战北马其顿前夕,收到好消息,上仗对土耳其停赛嘅左後衞祖奥简斯路今场可以复出,有番呢位「助攻王」帮手,肯定可以创造更多入波机会。至於早前确诊新冠肺炎嘅中坚比比亦有望复出,葡萄牙阵容日趋完整,赢波出线机会更加大。
- 05-24曼城先声夺人!孖宝齐攞英超最佳奖项
- 05-24C朗受伤缺阵煞科战 曼联随时冇埋欧霸资格
- 05-24正式反面!罗拔仔经理人:拜仁已成历史!
- 05-2421/22英超冠军-曼城-最终战骇人游戏
- 05-24曼联新帅首次专访 10条妙计激活红魔鬼
- 05-24奇兵根度简省两粒 曼城戏剧性反胜维拉夺冠
- 05-24孙兴民激斗沙拿齐夺金靴 亚洲史上第1人
- 05-24感激曼城支持 辛真高想将奖盃带返乌克兰