曼联看守领队兰历克向来思维创新，虽然执教「红魔鬼」成绩未见突出，但系佢近日提出一项改革英超嘅建议就获接纳。据报由下季开始，英超球证将会加入各球会嘅日常练习，改善球员同球证之间嘅关系，亦可以畀双方适应球例嘅应用。

英国《每日邮报》报道，近日一个为期2日嘅英超高峰会议，兰历克提出安排球证去到各球会嘅训练场一齐练习，包括畀球证使用练习设施，以及喺队内比赛入面执法，目的系提升球员同球证之间嘅认识同改善关系，而呢个动议即场获得大部份球会以及英超球证代表莱利嘅支持。

报道指英超职业裁判员公司（PGMOL）已就兰历克嘅计划进行研究，细节落实後预计下季开始可以正式执行。另外，高普、林柏特、谢拉特等领队都提出，要专门球证负责处理VAR执法，包括要球证通过严格训练，再选取最佳人选去处理VAR执法，减少有关嘅争议判决。