阿积士教练坦哈格成为曼联下季新领队大热人选，但红魔鬼前主帅尹戈尔以过来人身份，劝呢位荷兰同胞唔好成「魔」，因为曼联重视商业经营多过发展足球，任何人执教呢支英超球队，都会遇上重重困难，日子一定唔好过。英国传媒早前指坦哈格已经去咗曼联接受面试，有意接手领军，但经过前辈尹戈尔咁样一讲，随时打退堂鼓，令曼联换帅计划受挫。

尹戈尔曾於2014至16年执教曼联，加上亦系阿积士史上其中1位最佳主帅，传媒自然要问佢对於坦哈格可能执教曼联嘅睇法，身为现任荷兰国家队领队嘅尹戈尔老实唔客气，公开叫坦哈格拒绝曼联：「坦哈格系1位好教练，如果佢执教红魔鬼，对於球队有利，但曼联系1间非常商业化嘅球会，对於任何主帅来讲，都非常难处理，我建议坦哈格选择1间真正重视足球嘅球会。」

自从格拉沙家族2005年入主曼联後，令球会负债累累，以搵钱行先，一直为人诟病，特别系转会策略方面，近年注重签入大牌球星推动商业收入，但又未必系球队所需要嘅球员，导致空有强大阵容，却踢唔出应有成绩，最终受罪嘅人系领队，导致不断换帅，难怪尹戈尔劝坦哈格唔好教曼联。

不过，亦有唔少网民认为尹戈尔咁讲，系想报复曼联当年炒佢之仇，佢2014年夏天强势加盟曼联，但首季仅於英超取得第4位，第2季更加跌至第5位，最威水只系捧英足盃冠军，结果被炒，其後淡出球坛，休息咗5年，直至上年8月先至复出，接手执教荷兰国家队，并领带球队打入世界盃决赛周。

呢位70岁名帅对於当年被曼联炒鱿，仍然耿耿於怀，指当时红魔鬼「揸弗人」活华特一早已经决定换帅，但又迟迟唔出声，令佢领军最後半年时间非常尬尴尬。因此，网民认为呢位「方丈」小气，想破坏曼联聘请坦哈格嘅好事。除咗坦哈格之外，普捷天奴、安历基、卢比迪古都系曼联新帅人选。