葡萄牙距离2022世界盃决赛周只差1步，C朗拿度嘅表现当然举足轻重，不过依家嘅葡萄牙已经唔再系C朗嘅「一人球队」，利物浦前锋迪亚高祖达今季表现，已经证明佢对球队重要性，唔会少得过C朗拿度！

要数今季葡萄牙最弗球员，迪亚高祖达当之无愧，佢今季球会各项赛事已入19球，压倒18球嘅C朗成为5大联赛入波最多嘅葡萄牙球员。另外，葡萄牙今届世盃外射手榜，C朗以6球排第1位，迪亚高祖达5球仅随其後，但C朗踢8场6球当中，有4球嚟自鱼腩卢森堡，相反迪亚高祖达踢6场入5球，有对塞尔维亚嘅2个入波，以及上仗对土耳其嘅关键入球。

葡萄牙国家队有唔少曼城同曼联球员，迪亚高祖达表明「球会死敌」唔会影响国家队合作：「我哋经常都会讨论英超嘅敌对形势，不过当比赛嚟到，我哋会同其他球员一样全力应战。」葡萄牙上场淘汰土耳其後，般奴费南迪斯就曾喺社交网大赞迪亚高祖达「永冇甩拖」。