周一(28日)凌晨世盃外中北美洲区赛事，近年成绩急速起飞嘅加拿大，主场以4比0大胜牙买加後，提前锁定晋级资格，自1986年後再度进军世界盃决赛周。排次席嘅美国喺另一仗5比1大胜巴拿马後，基本上99%肯定跻身决赛周。

加拿大今届表现突出，一直压住两大班霸美国同墨西哥，今仗赢波即出线下决心十足，13分钟就由施利拿连打破僵局，达庄保查兰完半场前射成2比0。加拿大下半场放慢节奏，尾段仍凭凯列特入波以及对手摆乌龙，凑成4比0大胜，喺只剩1轮下领先第4位哥斯达黎加6分，肯定拎到前3名直接出线席位。

加拿大对上一次出线决赛周，已经系1986年嘅墨西哥世界盃，加拿大领队靴赛後兴奋表示：「加拿大系个足球国家，我哋要相信自己，美好嘅事会继续出现，依家只系开始。」

中北美洲区形势已经明朗，除加拿大率先出线外，同得25分嘅美国同墨西哥，齐齐领先哥斯达黎加3分，而且美国嘅得失球有极大优势，最後一轮作客哥斯达黎加输少过5球就肯定出线，墨西哥嘅得失球亦好过哥斯达黎加4球，最後一轮亦只系对弱旅萨尔瓦多，晋级机会高唱入云。