日本喺世盃外亚洲区第三圈B组最後一轮，主场以1比1逼和越南，以和波完成最後一仗，日本今场踢得曳，引来球迷不满，但主帅森保一仲话今届世盃目标系要打入8强，认真大口气！

今年大年初一中国队输畀越南，令人想起范志毅多年前名句「再下去要输越南了」，估唔到今次几乎轮到日本！上半场19分钟日本被对方一次角球攻势，由阮清平头槌破网，半场日本落後0比1；战至下半场54分钟，日本队长吉田麻也把握对方门将接球甩手，近门执鸡扳平，最终亦以1比1完场，避过输波厄运。

赛後球迷对日本踢成咁嘅样当然唔满意，矛头指向主教练森保一，佢喺第三圈头3仗输2场，几乎被炒鱿，幸好及时修正取得6连胜成功出线，先至保住帅位，对於今仗表现：「很抱歉未能获胜，我哋要提高球队竞争力。」

队波踢成咁，森保一仲话要入8强：「我哋会将目标定为世盃8强或更高，对球员会有严格要求，将优势转化为胜势，系我嚟紧嘅主要工作。」