阿仙奴3年前用7,200万镑收购尼高拉斯比比，但呢位科特迪瓦翼锋一直踢唔出水准，今季更长居後备做布卡约沙卡嘅後备。呢位26岁球星日前接受访问，暗示考虑季尾离队，阿仙奴亦准备物色新翼锋，目标直指荷兰新星加普。

尼高拉斯比比今季英超只有5次正选上阵，佢受访表示：「当球队一直赢波，教练好难更改正选阵容，阿迪达(领队)有同我解释过呢件事，我明白我要喺练习中保持好表现去争取上阵时间，不过冇球员会唔想落场，今季对我嚟讲系困难嘅一季，我要尊重领队决定，集中实现球会今季嘅目标，之後先再打算。」

据报尼高拉斯比比将离队寻求上阵机会，而荷兰媒体就爆料，指阿仙奴睇中燕豪芬翼锋加普，呢位22岁新星今季各项赛事有16个入波同15次助攻，转会费达4,200万镑，消息指拜仁慕尼黑同巴塞隆拿都对佢有意，但阿仙奴目前处於领先位置。