曼联今季成绩欠佳，早前喺欧联16强出局，争入英超前4位，形势亦唔乐观，英国《太阳报》爆料，指C朗同曼联合约之中，捧今届欧联冠军有250万镑奖金，但现时已见财化水，如果红魔鬼入唔到今季英超前4位，另外250万镑奖金都会冇埋。

据悉C朗效力祖云达斯时期，基本周薪高达80万镑，但重返曼联之後，减至45万镑，为咗弥补固定薪酬损失，呢位葡萄牙国脚同红魔鬼签订嘅合约加入多项奖金条款，包括曼联夺得今届欧联冠军，佢可以获得250万镑，取得今季英超第4位有亦250万镑，捧英超冠军更加有500万镑。

从目前情况睇，欧联冠军奖金已经冇咗，英超冠军亦唔使谂，惟有寄望打入联赛前4位。曼联现时排第6位，落後第4位阿仙奴4分，兼踢多兵工厂1场，要晋身前4位并唔容易。

不过，C朗好有机会攞另一项奖金，就系成为曼联今季首席射手，佢为红魔鬼各项赛事入咗18球，比第2位般奴费南迪斯多9球。