C朗夥拍朗尼嘅双箭头组合，曾为曼联3夺英超及欧联宝座，佢两个仔喺啱啱过去嘅星期日於曼联U12合作，对西布朗同场入波！C朗大仔C朗Jr早前跟随父亲「转会」，由祖云达斯转投曼联U12，同朗尼个仔Kai做队友，重现昔日红魔双箭头威力。

Kai今年12岁，佢跟随父亲步伐学踢波，两年前加入曼联U队後即成为主力，系球队主力射手，据称入球量甚高，今个月5场比赛攻入10球，继承朗尼衣钵。

C朗Jr今年6月亦将满12岁，佢喺皇马、祖记年代嘅U队表现已经相当突出，近期跟随父亲转投曼联U队，比同龄队友高出一个头，佢今次「强势加盟」曼联，即时令红魔U队实力大增。

C朗曾预言，C朗Jr将会成为一位伟大足球员：「我冇刻意栽培佢踢波，但我同佢讲，无论你想成为足球员，或者做医生，都要全力以赴。」