意大利、土耳其两支啱啱喺世盃附加赛出局嘅球队，周二（29日）深夜喺国际友谊赛交手。当中意大利37岁队长基亚连尼喺被换出时，突然亲吻队长臂章，赛後更於社交网站写下感言，以上嘅举动都显示出依位中坚，随时会选择退出国家队。

意大利早前喺世盃附加赛，意外不敌北马其顿，连续两届无缘决赛周。今场国际友谊赛对住土耳其，球队阵容作出唔少调动，部分主力球员甚至无列入比赛名单，不过最终都能够作客反胜3比2，一洗近期颓气。至於队长基亚连尼今场就正选上阵，不过踢到76分钟被换出场时，佢将队长臂章除低後，突然亲吻一下，然後再戴上门将当拿隆马臂上，睇落相当不舍。

37岁嘅基亚连尼赛後仲喺个人社交网站发文，似乎向其国家队生涯正式道别：「上周四系悲伤嘅一页，但职业生涯难免有空白，最重要系有再次企起身嘅力量。 我相信依班球员，能够为意大利足球历史，继续写下重要篇章，令我哋重温去年夏天嘅时刻。永远为蓝军加油！」基亚连尼喺2004年11月17日首次成为大国脚，至今已累积上阵116次，射入8球，同名宿派路并列最多上阵次数嘅第5位，仅次於马甸尼、迪罗斯、简拿华路、保方。