曼联新帅招聘候选领先嘅坦哈格，早前传出准备组成星级教练团，邀请史谭、云尼斯达莱同尹佩斯做副手，虽然「云佬」刚落实喺燕豪芬坐正，无缘回归曼联，但另一名将史谭就表态，愿意返曼联做助教，为协助红魔重回高峰出一分力。

49岁嘅史谭於1998至2001年效力曼联，挂靴後一直做主教练，教过雷丁、飞燕诺及FC辛辛那提等队，虽然返曼联只能做坦哈格副手，但佢话唔介意：「如果佢哋想要我，我会毫不犹豫应承，曼联亦系我生命，我喺度度过伟大球季，赢过冠军，如果可以帮到佢哋，我会乐意去做。」

史谭被辛辛那提辞退後，至今一直无业，佢话一切听从曼联高层同主帅安排。