日前英格兰领队修夫基，公开关注卡塔尔建筑工人嘅人权状况，并质疑让该亚洲国家主办世盃决赛周嘅适当性，言论惹来世盃行政总裁艾卡达（Nasser Al Khater）批评，劝佢「应该要嚟卡塔尔亲身问吓啲工人」，并严斥修夫基应该小心佢嘅言行。

「三狮军团」教头修夫基国际赛期间接受访问时表示，喺卡塔尔嘅外来建筑劳工受到当地剥削，又质疑该亚洲国家主办世盃决赛周嘅适当性。不过，佢解释英格兰假如杯葛世盃可能冇咩效用，并承认一旦咁样做，会惹来各方批评。

此言论一出就触动卡塔尔当局嘅神经，今届世盃CEO艾卡达日前敦促修夫基应该「小心你嘅言行」：「我嘅问题系，呢位教练有冇嚟过卡塔尔？佢嘅睇法系咪只系建基於佢阅读过嘅内容？佢必须嚟到呢度亲身问吓啲工人，了解佢哋嘅真实情况。」艾卡达承认的确有工人被压榨，但呢啲只系个别事件，大部份工人都有良好待遇：「有啲送个仔去读大学；有啲人全家都安居乐业」。

值得一提嘅系，修夫基周六（4月2日）将赴卡塔尔参与抽签仪式，艾卡达表示希望双方到时可以面对面慢慢倾：「我期待聆听佢嘅意见，我会尊重佢，当有人同你意见相反，你会话佢知你个版本，我哋可以选择信定唔信，悉随尊便。」