C朗拿度季前宣布重返曼联，不过球队今季再次四大皆空，甚至随时连前4位置都拎唔到，有球迷就将矛头直指依位葡萄牙球星，甚至连曼联名宿兼C朗前队友朗尼，都喺《天空体育》节目中，公开表示引入C朗唔正确，认为红魔鬼目前更需要嘅系後生仔。

曾经同C朗喺曼联做过队友嘅朗尼，早前获邀上《天空体育》节目，当主持人问到佢点睇C朗今季重返曼联个阵，佢首先大赞依名好友嘅能力：「C朗仲可以成日入波，喺场上制造到威胁，好似季初佢曾经喺欧联射入关键入球，对热刺亦上演帽子戏法。」

不过朗尼之後都好诚实，认为C朗年纪已经渐大，球队更需要嘅反而系後生仔：「C朗唔再系二十几岁个阵嘅佢，好正常，足球就系咁。如果考虑到球队未来，一定要引入更後生、更具饥饿感嘅球员，咁样落到场先可以全力以赴。」

现年37岁嘅C朗，今季为曼联各项赛事上阵33场，录得18入球、3助攻，表现不过不失；但外界却批评依名球队首席射手，唔会喺前场帮手逼抢，跑动范围亦非常少，间接影响咗球队攻守。C朗同球队合约去到出年6月先完，下季睇嚟都好大机会继续留队，曼联前场要变都唔系咁易。