曼联看守领队兰历克下季将会转任球队顾问，为期两年。不过近日有英国传媒就指，呢位德国教头嘅顾问一职基本上形同虚设，因为佢每个月只系需要工作6日，甚至连下季拣边个做领队都冇份畀意见。

根据英国《每日邮报》披露，兰历克担任球队顾问只系兼职同「挂名」性质，因为两年内佢净系需要工作144日；另外球队拣新领队一事，甚至冇揾过佢畀建议。至於有关兰历克未来具体工作，暂时仲要取决於由边位领队执教。

另外，兰历克喺上周英超赛前发布会上，亦亲口证实自己并冇参与选帅工作：「据我所知，球队面试咗好几个人。但我仲未同佢哋倾过计，我暂时只想专注踢好比赛。」曼联目前话事权由足球总监穆特（John Murtough）、技术总监费查同首席谈判专员马修贾奇（Matt Judge）等人掌握，兰历克要插手绝对唔系易事。