周一凌晨（11日）英超榜首大战，利物浦凭住「寿星仔」沙迪奥文尼攻入关键士哥，作客以2:2逼和「1哥」曼城，继续咬住1分差距，争标形势依然紧凑。

赛前排榜首嘅曼城，只系领先利物浦1分咁大把，今仗绝对系冠军前哨战，曼城今仗复用加比尔捷西斯，配合两翼菲尔科顿同史达宁攻坚，红军则用穆罕默德沙拿、沙迪奥文尼同迪亚高祖达出任3叉戟，上周中欧联赢宾菲加有士哥嘅路尔斯戴亚斯先任後备。

曼城开波後先有史达宁近射被救出，5分钟贝拿度施华快开罚球，奇云迪布尼远射省到客军後衞祖尔麦迪比改变方向，收死红军门将艾利臣比加中柱入网。不过8分钟後，利物浦上演两闸齐飞，安德鲁罗拔臣左路传中，阿历山大阿诺特再将个波弹入中间，祖达後上快射得手，极速扳平。其後曼城门将艾达臣摩拉斯攞波突然跣脚，几乎慢溜入网，好彩佢快一步门前及时解围，去到37分钟，祖奥简斯路於左路嚟个大转向，冇越位嘅加比尔捷西斯入楔建功，亦系佢近5次主场对红军嘅第5个入波，令蓝月亮再度领先。

上半场畀人揿住嚟打嘅利物浦，易边後立即还以颜色，46分钟沙拿妙传啱啱30岁生日嘅「寿星仔」文尼再度追平，冇耐轮到祖达窄位抽射过唔到艾达臣摩拉斯。之後曼城再抢番主动，63分钟迪布尼交出靓直线，史达宁单刀射破艾利臣比加大细龙门，可惜VAR指史达宁越位在先，惨食诈胡，完场前後备上阵嘅马列斯罚球中柱弹出，最终打和2:2，利物浦仍只落後曼城1分，冠军之争仲有排斗。