曼联喺周六(9日)晚英超作客0比1不敌爱华顿，球星C朗喺比赛遭对手踢到小腿流血，完场後佢步入球员通道时，情绪失控出手打烂1位爱华顿球迷嘅手机，事後需要发声明道歉。

C朗今场曾经有1次入波黄金机会，但被爱华顿门将比克福特用手臂挡出，呢位37岁葡萄牙国脚唔止食白果，睇住曼联又失分，仲喺比赛中被对手踢到左脚小腿流血，步离球场时要一瘸一拐咁行。

当时C朗行到球员通道，弯腰睇伤口情况，通道边有1位爱华顿球迷疑似用手机影佢，呢位前锋起身後，出手拍走手机，部手机跌落场散晒。

呢一幕被人影到放上社交网，令人哗然，事後C朗发声明道歉：「艰难情况下要处理好情绪，并唔系一件易事，正如我哋目前处境，但都要以尊重及耐性，为喜欢足球嘅年轻人立下好榜样，我要为自己嘅鲁莽作出道歉，如果可以嘅话，我想邀请呢位球迷来奥脱福球场睇波。」

英国警方承认正在调查有关事件，了解是否涉及犯罪，将会翻查球场内闭路电视片段，并呼吁目击者提供线索。曼联发言人表示，已经了解今次事件，并会配合警方调查，意味C朗可能涉嫌损坏他人财物，卷入官非。