车路士经历联赛大败畀宾福特及欧联不敌皇马之後，喺周六(9日)晚英超报复性反弹，作客以6比0大炒修咸顿，领队杜曹终於松一口气，话呢场大胜系畀球迷一个交代。

车路士疯狂进攻，开波7分钟内，前锋迪姆华拿已经有2次攻门分别中柱同中楣，结果由马高斯阿朗素喺8分钟射入打开纪录。

车仔跟住攻势一浪接一浪，美臣蒙特、迪姆华拿、夏维斯各入1球，上半场领先4比0。换边後初段，迪姆华拿、美臣蒙特再各建一功，送够6只蛋畀修咸顿。

赛後杜曹话：「我哋一开始就寻找机会，拼抢时充满斗志，好有威胁，创造好多机会，一早已经解决对手，呢种就系我哋想要嘅表现，睇下比数，我哋终於畀大家一个交代。」

中场美臣蒙特今场表现大勇，入2球及1次助攻，佢话胜利令球队重拾信心，要将每场波都当成决赛咁踢。车路士将於周三(13日)凌晨欧联8强次回合作客皇马，车仔首回合输1比3，球队及时回勇，能否收复失地，大家拭目以待。