热刺喺英超以4比0大胜阿士东维拉，获得联赛4连胜，合共攻入14球，其中近2仗就轰入9球，火力惊人。哈利卡尼、孙兴民、古路施夫斯基成为入波泉源，自从古路施夫斯基2月首次为热刺喺英超披甲以来，3人成为呢段时间创造最多英超入波嘅前3位球员，可以话系英超最强「进攻铁三角」。

射手哈利卡尼虽然今场冇波入，但就贡献2次助攻，包括传畀孙兴民射入，呢位英格兰国脚已经21次喺英超助攻「老孙」入波，史上仅次於车路士经典拍档林柏特24次传畀杜奥巴入波。

古路施夫斯基绝对系热刺冬季最佳收购，佢今场1传1射，已创造9个英超入波，以呢位瑞典国脚首次为热刺喺英超上阵计起，哈利卡尼喺英超创造13个入球，孙兴民创造12个入球，3人成为呢段时间，创造最多英超入球嘅前3位球员。

热刺近况亦比3支争前4位劲敌阿仙奴、曼联、韦斯咸优胜，夺取下届欧联入场券形势乐观。