周六晚英超大战，阿仙奴主场对白礼顿。正与热刺争入前4寸土必争嘅阿仙奴，嚟到关键时刻出事，继上仗对水晶宫输0比3後，对白礼顿又输1比2，两场失5球，暂时排喺第5位，但咁样输法要反弹唔易。

阿仙奴今仗有基兰泰亚尼及汤马士柏迪受伤，阿迪达焗住变阵，格列沙加要串演左闸，至於近7仗1和6负嘅白礼顿轻装上阵，反而交出好表现，取得久违嘅胜利。

赛事初段阿仙奴抢攻，但优势唔明显，白礼顿稳住阵脚，靠反击搵食，卒之喺28分钟一次长传搞掂，美维朴右路突破落底线传中，李安度杜沙特接应撞射破网，白礼顿意外领先1比0。

半场补时期间阿仙奴终於送球入网，但可惜睇完VAR发现加比尔马天尼利越位，被判诈胡，半场阿仙奴落後0比1。

白礼顿今场赢波绝对唔系负碌，67分钟一次非常复杂嘅互传，最终由美维朴禁区外窝利劲射破网，射成2比0稳住胜局，去到尾段阿仙奴狂攻下两次中楣，最终靠马田奥迪加特远程射门省中韦碧克皮球抛物线笠入，追成1比2完场。