曼城功勳中场费兰甸奴，近日接受访问时，证实自己将会喺完季後离队，并透露将会返到家乡巴西，继续职业球员生涯。

费兰甸奴同曼城嘅合约将於今年夏天到期，此子嘅去留问题一直备受关注。喺同马德里体育嘅欧联8强次回合对决赛前，呢位巴西老将亦被问到前途问题，佢明确交代道：「我唔会留队，我想要更多机会踢波，我同屋企人做决定，未来会返巴西。」费兰甸奴透露曼城会方已经有人知道呢个决定，但领队哥迪奥拿就似乎後知後觉，去到记者会期间，先从记者口中得知呢个消息，虽然系咁，哥帅依然对费兰甸奴嘅决定表示理解。

现年36岁嘅费兰甸奴，2013年由萨克达转投曼城，效力「蓝月亮」9年间，帮助球队4度捧起英超冠军，以及赢得各项本土盃赛锦标。不过呢位曼城队长，近期上阵机会逐渐减少，今季联赛只获得6次担正机会，而费兰甸奴则认为自己仍有能力继续披甲，亦因此萌生去意。