早前曾经喺荷兰电视节目中透露，患上前列腺癌嘅荷兰国家队主帅尹戈尔，近日公开表示已经成功接受治疗，击退身体内嘅癌细胞，将会如常领军出战今年卡塔尔世界盃，「橙衣军团」嘅支持者终於可以松一口气。

「我已经经历完一切，接受咗25次放射治疗，然後再等待五、六个月，但事实证明真系有用。」尹戈尔康复之後，相信都唔会有太多时间休息，事关依名三度出任荷兰主帅一职嘅70岁教练，年底将会带队出战卡塔尔世界盃。喺世盃外G组力压土耳其首名出线嘅荷兰，世盃分组赛抽签被编入A组，将会同东道主卡塔尔、厄瓜多尔同塞内加尔争出线。

尹戈尔即使患上前列腺癌，但依名老牌教头依然保持专业，除咗早前继续亲自领军出战国际友谊赛，为免引起队内职球员担心，佢仲一直隐瞒病情，直至早前接受当地电视节目《Humberto》直播访问先首次公开，随即引起外界晔然。不过当时佢已经表明唔会辞任荷兰领队，如今病情好返晒，相信尹戈尔可以专心带领「橙衣军团」再创佳绩。