衞冕冠军车路士琴日深夜喺欧联8强次回合，作客上演绝地反击，同皇家马德里激斗至加时，最终总比数以4比5被淘汰出局。赛後领队杜曹就对主球证相当不满，事关下半场马高斯阿朗素曾经因手球惨食炸胡，但佢并无亲自去场边翻睇，完场後甚至仲同皇马领队安察洛堤有讲有笑。

首回合落後1:3嘅车路士，作客嚟到班拿贝球场一直压住嚟踢，64分钟马高斯阿朗素杀入禁区，扣过对方守衞再右脚抽入，不过VAR裁判却指依名西班牙後衞起脚之前，个波弹到只手，判入球无效，令车路士无辨法早早扩大比数，埋下出局伏线，杜曹大闹球证应该主动啲去翻睇：「我喺首回合已经感觉到球证有啲误判，仲有今日虽然我冇清楚见到（阿朗素）个球，但我超级失望球证竟然冇亲自去睇VAR。你系主裁判，唔应该交畀球场外坐喺房嘅人做决定。」

另外令杜曹更加嬲嘅系，赛後见到球证竟然同对方领队安察洛堤有讲有笑：「我好失望，当我想走过去同球证讲多谢个阵，发现佢同紧对方主帅笑住倾计。一支球队喺120分钟竭尽全力，但赛後球证反而同对手一齐笑，当时绝对唔系属於一个好嘅时机。」