C朗率领曼联喺上周六输畀爱华顿之後，再拍甩小球迷手机，据报小球迷患有自闭症，搞到C朗近日周身蚁，出现暴躁、恰细路等指控，C朗喺IG道歉并邀请对方去奥脱福睇波亦遭拒绝，究竟点算好？C朗昨日竟然喺IG上载焗桑拿短片，面带微笑，唔通拆掂咗？

C朗喺IG公开道歉，并邀请对方睇波，曼联官方称不作处罚，但警方调查继续，小球迷母亲则表示唔会去，仲话要C朗当面道歉先收货，咁样再搞落去真系没完没了，英国传媒《The Athletic》有最新消息，原来C朗已派人接触小球迷母子，商讨赔偿事宜，照咁睇应该拆得掂。

事後现场有更多影片流传，有一段是开赛时C朗步入球场期间与一名小球迷击掌，并证实该小球迷就是赛後被打甩手机嘅同一人。

另外曼联随队记者Laurie Whitwell指出，佢观察到今次事件C朗出现多个错误，例如最低限度应该赔偿一部新手机，再同小球迷私下倾谈，而唔系无视所有人，喺IG发个道歉了事实在唔恰当。

该记者认为，曼联应该安排心理医生为C朗作检查，因为包括今次事件，C朗经常情绪失控、随意表达不满、埋怨队友，对球队唔系好事。