利物浦周四(14日)喺欧联8强次回合，主场出击下被宾菲加逼和3比3，但两回合合计仍赢6比4跻身准决赛。利物浦领队高普赛後承认变阵「出事」，不过球队成功晋级，令佢追平轩历基斯同希斯菲特纪录，成为德国入欧联4强次数最多教头(4次)。

利物浦首回合作客赢3比1，今仗返主场「坐定粒六」，领队高普亦决定留力准备周六(16日)对曼城嘅英足盃4强战，同上场联赛相比作出7个调动，包括防线收起华基尔云迪积克、阿历山大阿诺特同安德鲁罗拔臣3名正选。

「红军」21分钟由伊巴希马干拿迪角球顶入领先，虽然32分钟被追平，但罗拔图法明奴喺55分钟同65分钟连下两城，将比数拉开到3比1。大局已定下利物浦出现松懈，宾菲加由耶梅卓克同达云纽尼斯两度突破越位入波，追成3比3平手，但两回合约利物浦仍赢6比4。

虽然杀入欧联4强，但高普对几个失球仍耿耿於怀：「入4强当然非常好，但呢场比赛发生嘅事会被谈论，当我对入4强都唔系觉得开心到飞起，就证明有嘢唔妥。利物浦今场大部份时间踢得好好，不过欧联系讲究细节，我哋嘅越位陷阱发挥得唔好，呢个系我嘅错，因为我换咗7个球员。」