曼城喺欧联8强淘汰马德里体育会，不过付出嘅代价都非常之大，面对对手嘅粗野踢法，菲尔科顿被打爆头要紮住踢，奇云迪布尼同基尔获加亦先後受伤离场，加上後防主将祖奥简斯路喺比赛尾段食黄牌，4强对皇家马德里将要停赛，影响巨大。

菲尔科顿、奇云迪布尼等今场成为马体会重点「招呼」目标，比赛早段菲尔科顿顶波，菲腊比蒙达里奥从後猛烈撞向佢头部，令呢位英格兰小将即场治疗3分钟，最终通过脑震荡测试可以继续比赛，但个头就要紮上绷带。不过奇云迪布尼同基尔获加就冇咁好彩，下半场先後被踢伤同撞伤，被逼提早退下火线，周六(16日)对利物浦嘅英足盃4强大战上阵成疑。

比赛尾段两队情绪失控，曼城守将祖奥简斯路亦沉唔住气，鲁莽犯规拎到黄牌，令佢喺4强首回合对皇家马德里要坐波监，呢位葡萄牙国脚系曼城防线嘅重要一员，停赛会大大影响球队嘅部署。