曼联球星C朗上场英超对诺域治轰入3球，两度效力曼联合共踢咗222场英超，取得99个入球，换言之只要周三(20日)凌晨「双红会」作客利物浦，再入1球，就达到百球大关，如果C朗可以喺呢场大战，写下新里程碑，就更加大意义。

C朗喺英超入波最多一季系2007/08年球季，有31球进帐，成为该季神射手，佢加盟皇马前，为曼联入咗84个联赛入球，加上今季入15球，累积入99球，红魔鬼今季剩下6场联赛，C朗要再入1球，应该唔难，如果下场对宿敌利物浦，完成壮举，就更加完美。

另外，C朗以37岁零70日成为英超史上第2大年龄上演「帽子戏法」球员，仅次於舒宁咸(37岁零146日)。根据C朗同曼联签订嘅合约，佢每次「戴帽」都可以获得10万镑奖金，一季入波达20球就有75万镑奖，佢今场入3球，今季各项赛事已有21球进帐，换言之今场波为佢带来85万镑奖金收入。