曼联喺周六(16日)晚英超主场以3比2击败诺域治，C朗上演帽子戏法，亦系呢位37岁葡萄牙国脚职业生涯第60次「戴帽」，并连续16季入波「20+」，最难得系相隔651日之後，终於再次射入罚球，重现颠峰时期风采。

C朗职业生涯累积60次帽子戏法，比宿敌美斯多5次，其中球会赛事50次「戴帽」，国家队有10次。呢位射手两度效力曼联合共有3次连中三元，前2次系2008年1月对纽卡素，以及上月对热刺，可见C朗以高龄重返曼联，反而上演帽子戏法次数仲多过年轻时期效力红魔鬼。

事实上，C朗长年保持高水平状态，今季为曼联各项赛事入21球，连续16季球会赛入波「20+」，其中英超占15球，成为英超史上首位单季入到15球嘅36岁以上球员，仲有机会再改写纪录。

另外，C朗今场以一记精彩罚球为曼联奠定3比2胜局，亦系佢自2020年7月之後，再次射入罚球，该仗佢协助祖云达斯大胜拖连奴4比1。

C朗职业生涯累积入58个罚球，追平美斯，但近年入罚球数字锐减，今仗以行动证明自己仲系「罚球专家」。C朗至今12次喺英超射入罚球，排英超史上第3位，第1位系入18球嘅碧咸，第2位系入13球嘅修咸顿中场禾特普斯。

曼联赢波之後升上第5位，只系落後第4位热刺3分，争入前4位参加下届欧联仲有希望。