效力宾菲加嘅达云纽尼斯今季表现令人眼前一亮，据闻佢已被多间球会留意住，极有机会今夏转会。佢日前更透露，自己嘅偶像系效力曼联嘅同乡卡云尼，唔知系咪对自己嘅转会意愿有所暗示呢？

22岁乌拉圭新星达云纽尼斯，今季为宾菲加上阵37场攻入32球，两回合对利物浦嘅欧联8强战都有入波，可见佢嘅潜力相当优厚。据闻目前已经有多间欧洲豪门对佢有兴趣，包括车路士、阿仙奴等，而宾菲加已为佢标价至少6,000万英镑。

不过佢日前接受意大利记者Fabrizio Romano访问时大爆，自己嘅偶像系效力「红魔」嘅卡云尼，惹人揣测佢系咪暗示自己想转会曼联。事实上，曼联同纽尼斯扯上关系绝对有迹可寻，早前佢解雇自己嘅经理人，同时间卡云尼同球队嘅合约去到今夏就完，看守领队兰历克不讳言球队需要搵替代人物，但如果达云纽尼斯就系卡云尼嘅替代者，咁佢咪冇得同偶像做队友？