拜仁慕尼黑喺欧联8强出局，一众球迷对球队演出极度不满，教练拿高斯文更成为众矢之的，呢位德国少帅自爆收到450宗死亡恐吓，虽然佢话会接受球迷批评，但就批评球迷连佢阿妈都攻击，直言：「要搞就搞我！」

只系34岁嘅拿高斯文见惯大场面，佢日前表示：「我知道受批评系足球一部份，好正常亦冇问题，不过欧联出局後我喺IG收到450个死亡恐吓，真系唔容易应付。有人想杀死我系一回事，但佢哋连我个唔睇波嘅阿妈都攻击，我真系唔明白，佢哋仲要觉得自己冇问题，咁先系最疯狂嘅事。」

除拿高斯文之外，唔少拜仁高层都收到球迷死亡恐吓，不过拿高斯文就话球会未有计划加强保安：「球会暂时冇呢个打算(增加保安)，我哋唔想激嬲任何人，至少到依家为止，仲未有人喺我屋企门口外面出现。」